Oté

« Si ou i vé tir d’lé avèk in vash, komans par grate son do »

In kozman pou la rout

Justin / 9 mars 2019

JPEG - 43.6 ko

Sa i rapèl amoin in vyé zistoir défin mon papa téi rakont anou tazantan. Li l’avé in vash sépa si lété Marinette sinon Fifi, li té i apèrsoi èl téi done moinzanmoinss do lé. L’èr-la li téi gate aèl, téi aroz son fouraz avèk lo d’sèl, mèm son rasyon maskade li té i goumant mé arien pou fé. Son tété lété kaziman flak kan téi ariv l’èr pou tir d’lé. In zour li la vni granmatin mèm é zour-la li la dékouv lo potoroz kan li la trouv in zoinalyé-san kilo lété son pti nom gaté - koushé sou lo vash apré boir o pyé. Donk lé forsé kan téi ariv l’èr la trète l’avé konm in mank... Kosa la spassé ozis ? Mi koné pi mé sirman lo volèr d’lé o pyé la pa gingn in shaplé félisitasyon… Mé alon arvir dsi nout provèrb-in provèrb komor pou zordi mé mi pans sa lé vré partou… Si in moun néna la boush do myèl avèk ou lé pa rar li l’apré rode tiré kom i di. Alor, méfyé ! Alé ! Mi kite azot rofléshi la dsi é ni artrouv pli d’van. Sipétadyé !