Provèrb la, sa bann z’indien l’amérik la ramass sa ! Pou kosa zot la ramass sa ? Pars, pou bien konète in moun i fo ou i koné par ousa li la fine pasé. Lé fasil ète sévèr ! Lé fasil ète san pityé ! Mé pou ète konmsa i fo ou i koné la pèrsone épi son parkour. Souvan dé foi, mi antann demoun apré kozé é sanm pou moin zot na poin sak i pé apèl la konprénir d’moun. La konprénir sé kan ou i pé mète aou la plas kélk’in é ou i pé konprann, dann out shèr, é dann out kèr pou kosa la pèrsone la fé in n’afèr konmsa. Pa dan la tète ! Pars la tète la poin la sansibilité. Dé foi, mi antann désèrtin dir, lo pli mové ziz sé in ziz san l’éspèryans la vi, é mi pans sa lé bien vré. San l’éspèryans la vi, ou lé konm in vèr d’lanp : ou i kass sansa ou lé kassé. L’èrla, mi lèss azot rofléshi la dsi é ni artrouv pli d’van sipétadyé.