Nana shomin galizé, épi nana kou d’kongn la vi. Dann shomin galizé, toutt lé fasil. Dann parkour kou d’kongn, toutt lé difisil, ou poz aou toutt sort kalité késtion ; ou koné pa oussa ou sava.
Alor, kossa ou pé fé ? Ou pé fonss tèt béssé épi batt out tèt dann mïr. La pa bon !

Ou pé gard an aryèr pou savoir koman ou la fé pou mèt aou dann trin sansa pou désid kossa ou sava fé pou sort dann trin èk lo réspèk out parkour la vi, sèt out bann valèr, épi sèt ou l’aprann avèk out bann zansèt.
Sa, sé in bon manièr pou trik bann pièj nana épi nora sü shomin.

Sak lé vré pou in moun, lé vré pou in pèp : l’inn konm l’ot nana son listoir épi son"génie", l’inn konm l’ot lé éné épï la grandi dann son kïltïr. Lo passé sé nout limièr pou klèr lo prézan épi mèt an l’èr nout lavnir.
Kossa va klèr nout shomin ? Sé nout passé k’va klèr nout shomin. Bann saj la bien rézon di :
« Si ou koné pa oussa ou sava, majine bien oussa ou sort ».

Justin