Matant zélida la ékrir Justin :

Mon shèr nové, mon spès salté, rouj-de-fon dovan l’étèrnité, astèr si mi konpran bien azi bann travayèr la pi asé pou zot, astèr i fo azi bann rotrété, pous banna marsh dann shomin pou défann soidizan z‘ot droi, pars d’apré sak mi antan koméla, asiz a grate son flan sré l’ésploitasyon é domann azot in solidarité pou lo péi, sa lé tro for pou zot koprann é na mèm désèrtin i vé pa konprann inn tyork. Alé ! zot na ka kontinyé si zot i kroi larzan i trouv dsou galé. Mé si zot i trouv pa la pa bézoin sa i rann azot tro tris, pars normalman i trouv pa.tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, in kékchoz konmsa vénan d’où sa i étone pa moin ditou. Matant, ou lé vyé é ou na poin la solidarité par raport bann vyé ou mèm. Astèr gouvèrnman l’apré plime aou konm bann rotrété, astèr ou lé dakor avèk li. Ou i vé mèm pa oir, pou soidizan in késtyonn solidarité nasyonal gouvèrnman-la l’apré dépouye bann pov pou gonf lo pla bann rish. Aprésa, ou i di na poin arien pou fé é ou i ankouraz bann vièye pèrsone pou rèss bra balan san fé arien, mèm san défann azot. Atann ou sar tou ni pou rode in linz pou mète dsi ou don ! Tok ! Pran sa pou ou !

NB . Mi sort antann dann radyo in moun soidizan rotrété apré di li lé dakor si sé dann l’intéré d’La Frans. Pou mon par moin noré di ali, si moin l’avé gingn la lign, kan li v’ariv la kèss magazin mi souète li domann mésyéRoland Garros, la min dann posh, pou pèye son komisyon. Rotok ! Ropran sa pou ou !