Oté

« Si ou la poin lo shien pou alé la shass, ou naka amenn kabri »

In kozman pou la rout

Justin / 5 novanm 2018

JPEG - 43.6 ko

Mi koné pa si étan jenn zot la parti la shass. Pé sfèr zordi zot i sava ankor la shass ? L’èrla mi koné pa si zot i amenn lo shien la shass avèk zot, sansa si zot i amenn pa. An touléka, sak mi rapèl sé kan moin lété jenn moin téi amenn pa lo shien la shass avèk moin. Lé vré in shien i pé z’ète bon pou fé lèv kisoi pèrdri, kisoi pizon ramyé, kisoi lyèv, défoi mèm tang… mé la pa toultan ou néna in shien out dispozisyon. Alor in kozman antiyé i di konm sak zot la lir an-o la. Mé a bien kalkilé in kou d’valval i pé fé lèv in zibyé par li mèm, sansa in shasèr i pé fé dézord pou sa… Astèr si ou i lir bien kozman an-o la, ou i pé dmandé kosa li invite aou pou fé. Pou moin li invite aou si ou néna pou fé in n’afèr é si lo zouty ou néna la pa bon, ébin ou i fé konm ou i gingn - ou out méyèr posib ! Alé ! Mi kite azot rofléshi la dsi é ni artrouv pli d’van. Sipétadyé !