Oté

« Si ou lé kontan kan i malparl in n’ot, sirman va malparl aou galman »

In kozman pou la rout

Justin / 3 séptanm 2018

JPEG - 43.6 ko

Mon bann dalon, zot i koné bien koman ni lé nou isi La Rényon. Ni yèm la di la fé é la pa arienk zordi. Kan dé-troi pèrsone lé ansanm, vitman-vitman zot i mète a kass do sik dsi l’do in moun la pa la. Si lo moun lé la, sé arienk in n’ot éspor ni pratik souvan dé foi, é sa i apèl kasaz ti-boi. Mé malparlé demoun na d’gou pou sa. Mi koné in madam i kass dosik dsi l’do son fiy avèk son garson, é i kass do sik dsi l’do son garson avèk son fiy, parl pi kan li trouv son momon. In n’afèr li majine pa sé ké otan li abiy son bann famiy, otan son famiy i abiy ali, otan li taye kostime pou lé zot, otan i taye kostme pou li. Final de kont lé pli préférab fèrm son také plito ké tro rouv ali. Alé ! Mi lèss azot rofléshi la dsi é ni artrouv pli d’van. Sipétadyé.