Oté

« Si ou lé pa sir i pèye aou alor manj o pyé »

In kozman pou la rout

Justin / 7 novanm 2017

JPEG - 43.6 ko

Nana d’moun la touzour bézoin fé fèr in kékshoz z’ot kaz. Kisoi koup zèrb ! Kisoi aranj in tol ! Kisoi fé mète karo ! Tout fason dann in kaz é dann in kour ou i trouv pal o bout zamé. An liské sa nana demoun la bézoin dé shoz initil. Solman lo ik, sé pass a la kèss. Nana demoun i yèm pa pèye konm k’i fo. Alé pa kroir sa lé valab pou bann pti kolon solman, lé valab galman pou bann gro kolon. Lé valab galman pou bann sosyété ! An touléka sa sé in n’afèr i ariv pli souvan k’ni kroi. Donk la solisyon sé d’manj o pyé kan ou i pé donk domann l’avans, é si ou i pé pa, pran out distans é si posib ou i done in rézon in pé valab. Romark na dé foi demoun i domann l’avans é apré sa rovoir Pyèr, tak baro. L’èrla ousa i lé la klé lo problèm ? Lo klé lé dann la konfyans. Alé ! Mi lèss azot réfléshi la dso é ni artrouv pli d’van sipétadyé.