Oté

« Si ou lé préssé, pran out tan »

In kozman pou la rout

Justin / 28 zwiyé 2020

JPEG - 43.6 ko

Médam zé Mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo vré mason. Mézami, dann léspor, toultan moin téi antann : « i fo pa konfonn vitèss avèk présipitasyon » é sa lé bien vré. Si ou i présipite, ou lé riskab pète atèr, é tout lo lénèrji ou i mète pou fé la vitèss lé riskab d’ète pèrdi. Si ou i pran out tan, si ou lé bien roganizé, si ou i done aou lo moiyin pou ariv o bite ébin ou néna inn shans arivé mèm si lo tan lé in pé zist pou trap out lobzéktif. A ! Biensir, i di pa ou, alé trinn dann shomin, i di pa ou alé pran tout bann shominn travèrs, mé i di aou, pran lo tan k’i fo. Ala in bon règloman . Néna poin arien lé vré konmsa ! Mi kite azot rofléshi la dsi é ni artrouv pli d’van. Sipétadyé.