Sa zistoir in jènn marmay i lèv granmatin, i sa bat karé dann in savane, mi koné pa bien ousa o zis : li lé kontan, li lé fyèr. Son kèr lé konm in kèr d’solèy. Toudinkou, li marsh dann in nafèr, li mank bat son déyèr a tèr. Kosa i lé ? L’odèr avèk la koulèr épi la fason ki prézant, la poin pou douté. In shien la pas par-la, la soulaz son kor.

Na dé zour lé konm sa : i fé l’èr tout i roul bien, épi i ariv in nafèr, i mèt dézord dann out program, out l’imèr i vien barbouyé. Mi pans zordi, gouvèrnman La Frans, son l’imèr i doi z’èt barbouyé. Na in somen, li té i tyé sèt, blès katorz. Té i prétan ziska, li téi vé fé in parti d’gosh par li mèm, dann son mazorité, pou ranplas la gosh akoz pou li sèt-la té kaziman mor. Zot i oi dan kèl éta d’vantardri, li té fine arivé ? Par l’fèt tout i roul ron.

Sof ké dimansh soir tout i dévir : la gosh lé près an l’èr, épi la droit, figuir i asiz : li lé dépité, mèm si li nana la mazorité. Nana in kozman, pou mon par, i pé donn a réfléshir. Kozman-la i di konmsa : « Si ou marsh tèt anlèr, ou lé riskab pa oir ». Sak lé marké an o-la.

Justin