D’apré sak mi antan di toultan bann z’afèr konm tranblomann tèr, léripsyon volkanik, sa sé dé shoz i koné i sava arivé, mé kèl zour kèl èr, i koné pa ozis. Mé, final de kont, la pa bézoin alé rode dann fon la tèr bann shoz konmsa. La maladi i ariv mé kan ou i koné pa. La mortalité i ariv galman mé parèye. Dé foi ou néna in kékshoz sèryé pou fé é ou i fé pa pars ou la pèr la mor i kal aou dann milyé. Provèrb l’Afrik moin la mark an-o la i di aou pa bézoin ézité, arète pa out mouvman, anvoye l’afèr… Mi koné pa kosa zot i anpans. An touléka, mi kite azot rofléshi la dsi é ni artrouv pli d’van si Bondyé na pityé-konm i di !