Matante Zélida la ékrire Justin :

Mon shèr nové, mon spèss salté, rouj-de-fon dopi létèrnité mwin l’apré piste aou dopi kéke somenn ou épi zote bande rouj apré domande la solidarité avèk zétranzé.

Lo ka d’Madégaskar i intérèss azot lo pliss la, pars li sorte toush dë siklone inn apré l’ote é lé pa fini. M’a rakonte aou kékshoze mwin la antande dann radio kan lété apré fé in sobatkoze dsi la solidarité avèk bande péi étranj.

Donk néna in moune la di : afère zot la pa rèst franssé plito k’ète indépandan. Zote noré bénéfissyé la solidarité d’La franss é otomatikman, san domande siouplé. Néna défoi i fo konète sak wi vé. Tok ! Pran sa pou toué !

Justin la fé pou réponss :

Mon vyé matante k’i koze toultan la bouh rouvèr, oute kozman i rossanb aou é sof mon réspé, i diré pou di in n’afère konmsa, in pé la tyé kouyon pou pran son plass.

Matante Madégaskar sé in gran péi : gran konm La Franss épi la Beljik, avèk 25 milyon d’moune zordi é biento 50 milyon d’moune si i suiv lo probabilité Arzoute ankor lo péi sar lo pli rish dann la réjyon loséan indien. Mi panss La franss sré bien avizé diskite avèk Madégaskar konm i fo, an péi adult, an prévizyon l’avnir é pa konm li fé. Dann noute lintéré anou é sa i fo pa ni obliye ; mi panss pou domin in bon kopérassion rante nou épi li. Mé nou va arkoze de sa.

Alor pou l’ède Madégaskar, m’a dire aou in pti kozman ; si ou néna pou doné, wi done, si ou na pwin pou doné, wi done oute kèr. Tok ! Pran sa pou ou !