Médam, Mésyé, La Sosyété koz èk moin sé koz èk in kouyon mé sé o pyé d’lo mir k’i oi lo mason. Mi koné pa si zot lé konm moin, pars si moin na afèr avèk in moun i koz in bonpé, moin lé touzour a d’mandé pou kosa i di bonpé la blag konmsa. Mi profèr san foi in moun i koz zis sak i fo, plito k’in moun i koz an longèr dann tout zafèr, épi i maye inn avèk l’ot é avèk l’ot ankor. Sa lé vré pou moin épi sa lé riské pou la pèrsone èl mèm. Pou kosa ? Pars si ou i blablate in bonpé, momandoné la pèrsone va rann aèl kont lo kozman lé fé dsi l’sab é in kaz dsi l’sab la pa solid. I vé pa di aou non pli lans solman in konklizyon san démonstrasyon pars ou i aprouv pa arien dann in ka konmsa. Pou ou, ou na rézon mé moin, kosa mi anpans moin-la ? La plipar d’tan mi pans pa arien é kan mi pans pa arien ébin si i fo done aou rézon, mi éskiv. Si ou i done amoin zargiman pé s’fèr mi tonm dakor avèk ou. Mé siouplé, la pa bézoin in diskour san fin, la pa bézoin in diaré lo fraz avèk lo mo. Alé ! Mi kite azot rofléshi la dsi é ni artrouv pli d’van. Sipétadyé !