Oté

Si ou néna rézon, tyinbo larg pa : la vi va fini par done aou rézon !

Justin / 21 séptanm 2018

JPEG - 43.6 ko

Ni pé di Paul Vergès sé papa la rout Tamarin é mèm tout bann demoun téi yèm pa li, i pran zordi la rout Tamarin nkonmsi sa lété la de toutan.A ! bien sir, sa la kout dé mil é dé san é moin lé sir in pé dann tan-la la pans avèk rout la, lo problèm sirkilasyon lété réglé dann l’androi. Poitan bann zournalis la koz avèk nout kamarad épi zot la bien antann sak li la di azot : li la vant lo rout, li la vant bann travayèr la fé la rout la épi lo bann bon zafèr lo rout Tamarin téi sar aport pou nou.

Mé li la di in n’afèr i diré demoun la pa tro antann pars zot lété si tèlman fatigé pass par Sin-Pol, par sin-Lé, par L’étan Salé ké zot la fé « ouf » é zot la pans zot l’avé pou ziska la rotrète. Mé Paul Vergès l’avé di : la rout Tamarin i sifi pa pou anbar la lo koma sirkilatoir. Li la di téi falé galman fé lo tram trin, épi fé la rout léo dann lèst, épi prolonz la rout Tamarin, épi fo modifyé nout manyèr déplasé dann nout péi. Solman nout kamarad la bien mète an gard dsi lo tout otomobil, dsi bann mové shoi laté fé kant mèm.

In matin moin la ékout in madam la pran la résponsabilité lo shéma d’transpor é kiryèzman moin la antann aèl parl koma sirkilatoir, in kozman i pass souvan dann la boush bann kamarad kominis épi bann moun i kashyète pa zot la v érité. Moin la antann in transpor par raye téi doi fé in bon parkour dann nout péi… Mi rogrète solman lo tan pèrdi pars konm i di lo tan pèrdi i ratrap pa zamé : biensir i ratrap lo tan pèrdi mé avèk lo tan é avèk in bonpé dépans an plis –avèk tout lo trikmardaz lé riskab arivé ankor dann bann z’ané k’i vien.

In n’ot afèr i fo pa néglizé é sa I pé apèl la pèrsévérans. Pou koué mi di sa ? Pars dopi 2010, lo tan Paul Vergès la pi komann la réjyon, néna in bann z’asosyasyon, épi in bann kamarad la amenn la bataye dann l’opinyon dovan tribinal osi si téi fo, mé sak zot la di mi pans la pa pèrdu. Tienbo larg pa é si ou néna rézon ou va fini par gingn rézon. La vi va donn aou rézon !