Oté

Si ou vi konpran pa sa, sé ké out zidé lé bien mal tourné

Justin / 4 zwin 2020

JPEG - 43.6 ko

Matante Zélida la ékrir Justin :
Mon sher nové, mon spèss salté, roujdefon dovan l’étèrnité, si mi suiv azot bien l’avé poin la maladi isi La Rényon é pou fèr bien bann La Métropol la inport in pé lo covid 19 shé nou. Sé sak mi konpran kan mi lir zot lartik dsi : in popilasyon an bone santé pri an otaz par linportasyon la maladi.
Mi rogrète de dir azot sa, mé si la maladi lé éné in l’androi… dizon La Shine... é si èl l’ariv partou sa i vé dir la fé in linportasyon l’ésportasyon é pou finir la gangrène tout la tèr. Donk partou la fé sa, alor, mi oi pa koman nora pi fé in n’ot manyèr. Sak zot i di na l’èr d’ète do bon sans mé dann la réalité lé pa d’bon sans ditou. Tok ! Pran sa pou toi.

Justin la fé pou répons :
Mon vyé matant k’i koz la boush rouvèr, vénan dé ou, sa i étone pa moin. Si ni di, kan la romark la maladi té apré kontamine anou, téi falé blok l’aéropor épizapré tèst lo maksimom demoun pou oir kisa lé malad épi trète azot do préférans avan zot ka i agrav ni fé ké di sak l’Oms la rokomandé.
Matant, néna dé zandroi la fé konmsa é la anpèsh la maladi zénéralizé. Dann péi konm Sésèl, péi indépandan, La nouvèl kalédoni, La Polinézi péi fransé la fé konm nou la di k’i fo fé épar shans la maladi la pa ariv an mass épi la pa tyé d’moun an kantité. Sak téi pé fèr laba, téi pé fèr isi os, in poin sé tou. Kan dofé i pran dan la kaz i fo tinn ali san rode lo si avèk lo la, lo patati avèk lo patata. Tok ! Pran sa pou ou !