Médam zé Mésyé, la sosyété, koz èk moin sé koz èk in kouyon mé sé o pyé d’lo mir k’i oi lo vré mason. Mézami, souvan dé foi la vi, konm listoir, i donn anou bon kalité loson. Dabor i fo méfyé bann flatèr pars konm La fontaine téi di : « In bon flatèr i viv o dépans sak i ékout ali. » Aprésa néna bann fo zami, sak i pans i fo pa di la vérité par méfyans, sansa pou pa véksé. La vi, ni koné sé in konba pou bonpé d’moun é konm dann tout konba ou néna in l’advèrsèr-sansa plizyèr - é sak i kontant azot lo pliss, sé kan ou i fé in l’érèr. Alor, méfyé bann konpliman in l’advèrsèr - sansa in l’ènmi - i adrèss aou. Si li krétik aou, la plipar d’tan sé pars ou néna rézon dann out konba. Dé foi non ! Sé pou sa mi kite azot rofléshi la dsi é ni artrouv pli d’van. Sipétadyé.