Dan la vi épi dann konba ou l’apré améné, ou néna zami, konm ou néna zènmi. Sa lé vré shak foi ou lé dann in konkirans avèk demoun, kisoi dan la politik, kisoi dann in zé d’sosyété, kisoi dann biznèss. La vi, fransh vérité, lé konm in shan d’bataye. Néna la guèr tou kour, é néna galman la guèr psycholojik, si zot i vé la propagane. La propagane sé mète out zènmi dann in sityasion difisil. Par koman ? Kan ou i krétik ali. Mé ou i pé galman flate ali pou fé fash ali avèk son prop zami. Antansyon, si ou i konplimant ali tro, li lé riskab kalkil kékpar li la fé in l’érèr épi rodrèss la bar si lé ankor tan pars i di osi, si mon zènmi i di lo bien dsi moin, sa i vé dir kékpar moin la tronpé. Alé ! Mi kite azot rofléshi la dsi é ni artrouv pli d’van. Sipétadyé !