Mi souvyin dann la kanpagn zéléksyon rézional, in gran rényon avèk demoun foulé vèy pa. Paul Vergès l’apré kozé é toudinkou li di, éskiz ali, li la koz tro lontan. Aprésa, li arzoute, kan li komans pou éspliké, li ésplik mèm pars li éstime demoun la vni pou ékouté, la vni pou konprann. Pa donn lésplikasyon, sé konm in mank réspé.
Souvann foi, mi antann dir, la pédagozi, donk l’ansègnman, sé in téknik k’i domann in bonpé la répétisyon… pars si promyé foi ou i konpran pa toute, dézyèm foi ou i konpran in pé plis, ziska ou i konpran toute pou vréman... Koméla, nana in bonpé manyèr, in bonpé zoutiy pou éspliké… konm la parol in moun, épi z’apré bann dokimantèr, épi z’apré ankor bann sobatkoz, bann lartik dann zournal. I pé ésplik an fransé, sansa an kréol, sansa dann d’ote langaz, mèm dann la lang bann moun i antan pa zorèy épi i koz pa.
Dann in kanpagn zéléksyon, sak lé an-nuiyan sé k’in pé i rakonte aryink la mantri, é si la mantri lé sinp, lé fasil pou konprann, la vérité lé souvan konpliké pou éspliké épi difisil pou konprann. Mé sa i doi pa dékourazé, si nou lé sir sak nou di sé la vérité. La vérité va trouv shomin pou li passé, si pa zordi, domin.

 Justin