Na d’gou war domoun i larg pa lo kor konm sa, sirtou kan lo konbat lé rèd, kan ni pé pa di avan komansé ni sar gagné. Lo poèt la di, tou lo tan i fo sobat. Victor Huguo “sak i viv sé sak i lit“ é i prétan “lo poèt na touzour rézon“ Donkalor ? Yèr té la fèt des pèr, an plis lo tan té in pé mosad-mosad é poitan, la ba Tansalé navé d’moun pou ékout Danyèl èk son bann dalon mé sirtou pou vanj kont la karyèr bwa-blan, kont tout karyèr la rènyon é boudikont kont la nouvèl rout di litoral.

Boudikont kisa va désidé si i fé ousinonsa si i fé pa la rout ? Lo présidan la rézyon i di partou, li va fé. Koué i anpans lo gouvérnman ? Lo présidan la répiblik lé plito myié la d’si, li té pou lo tram-trin rapèl a zot. La minis dé loutromer, sanm pou mwin son lavi i kont pou la po patat, konm si èl i évit lo sizé, èl osi zorèy kanar, Lo minis dé lékolozi, kosa èl i anpans ? Zistoman sé lo minis dé lékolozi ki dovré okip dé sa. Ala in moun konsékan, in moun néna pou di, sé son sizé.

Yèr tansalé domoun té la, lo konba i kontinié konm i di. Kantanou, mwa d’désanm na donn nout lavi, na di si ni vé, si ni vé pa. Aforss tatoné-tatoné, mi domann a mwin si lé pa Pari i tir kart an d’sou. Kisa i koz èk bouig ? Kisa i koz èk vinci ? Kisa i koz èk lo dé gran lantropriz ? Banna la pa bozwin pran lavyon pou kozé. Si tousala té désidé rant riv drwat riv gosh ? Si Pari i kontinié komann a nou ?