Mi arète tèrla zordi, mé mi pé dire azot la késtyon mi poze néna in sanss é sé lo sanss-la k’i fo dékodé pou nou avanssé : pou kossa noute lopinyon lé konm lo tyède zordi ?

Mézami si Paul Vergès lété ankor an parmi nou, mi panss li noré dé shoze a dir, issi, laba dann la franss, dann zorèye bande zom de pouvoir é parské sé li ké noré di mi panss sa noré fé léfé d’in pavé dan la mare… Sak i krétike zordi i krétik tro zantiman. Paul lété pa zantiye ditou, ni aranjan, ni toléran, kan lintéré lo pèp rényoné lété an danzé.

Alon majine in kou koman noute kamarade noré bate tanbour dsi la nouvèl la goumantassion lo nonb demoune mor avèk la kovide : 60 % an pliss ké dabitide kissoi lopital, kissoi zot kaze. Akoze néna in pik mortalirté konmsa… I diré mi antan ankor la voi noute kamade, in pé afébli par laze, mé roflé d’in mazinassion énèrzik. Konm kréol i di, mwin lé sirésèrtin nora okipe in pé é zot zorèye nora shofé - mi promète azot !

Alon majine ankor in kou Paul apré anparl lo danzé d’ète privé d’manzé pou in kantité d’moune la Rényon kissoi pars bato i tourne pi konm dabitide, kissoi pars lo pri sar télman shèr ké sak lé pov lé riskabe an manke toute zafèr. Mi panss, noute kamarade nora okipe in pé lo ka sak i gouvèrn é ki prévoi pa.

Zordi bande foyé la guèr i ménass rouv in pé partou é bande zanssien té i koné bien, konm La rényon i dépande pou in bonpé bande zinportassion, zot i konpran koman bande rényoné lé ménassé... Zordi néna in kanpagn éléktoral é bonpé kandida i kontante anou avèk lo tyède, alé oir la pa sa nou la bézoin, mé in vré politik salu publik.

Mi panss Paul si i lété an parmi nou, li noré di sa é son voi noré klate konm loraze é son kozman mwin lé siréssèrtin nora porté.li noré di par ébzanpe :

« Mwin la viv dann vante lo monstré é mi koné son zantraye mé mon flèsh lé konm sète David ».

Justin