Oté

« Si pijon i kaka dsi out tète, in bon lokazion pou lav out shové »

In kozman pou la rout

Justin / 2 mars 2021

JPEG - 43.6 ko

Mézami, provèrb-la sa sé in kozman l’afrik mwin l’aranj mon fasson : i fo toujour aranj son fasson, la kréolizasion i pass par la. Zot i panss pa ? Toute fasson, konm mi di la plipar d’tan : sak lé vré dann l’afrik, lé vréossi La Rényon épi in bon pé landroi dsi la tèr. Mi rapèl in zour in bon kamarade la gliss dann in tèr mouyé é li la tonm atèr, son gro zo d’kuiss kassé é médsin la romark li l’avé in gravmaladi. Olèrk s’anplégné, li la di : « In mal pou in bien ! ». Défoi kan i ariv aou késhoz lé pa vouli, sa i pèrmète aou avanssé. Sé sak nout provèrb i di, é sé in losson d’la vi pou nou konm pou toulmoun. Afèr s’anplégné, afèr grogné, afèr dispite ? Sa i ansèrv pa arien si wi sézi pa lokazion pou fèr kansréti in pti pa an avan. Alé ! Mi invite azot rofléshi la dsi é ni artrouv pli d’van. Sipétadyé.