Mi pans sa in provèrb kréol, pétète pa rényoné pars moin la zamé antann sa isi La Rényon, mé an touléka provèrb kréol, sa moin lé kaziman sèrtin. Sa i fé pans amoin bataye poul dann poulayé la kaz. Zot i koné plizyèr poul i pé ponn dann mèm ni, mé pou kouvé in sèl i kouv é sak i vé pran la plas lo promyé instalé antansyon kou d’bèk é mèm kok i mèl dan l’afèr. Tan k’a lo kozman li mèm sanm pou moin lo sans lé klèr : i vé dir sinploman okip out afèr, okip pa la myène. Fé pa konm désèrtin zoizo i kapar lo ni lé z’ot épi i mète lé z’ot déor. Alé ! Mi lèss azot rofléshi la dsi é ni artrouv pli d’van. Sipétadyé !