Oté

Si sa i apèl pa lalyénasyon dizon sa i arsanm bien !

Justin / 19 out 2019

JPEG - 43.6 ko

Vantredi té la rantré é konm dabitid l’aktyalité étan la rantré, bann zamontrèr i fé in n’éfor pou ète dann l’aktyalité. In drol labitid k’i fé ké solon l’édikasyon nasyonal, solon bann zamontrèr vi k’sé lékol zot i pans lé nésésèr mète la rantré lékol a l’ord di zour .
Pou mon par, moin néna in pti zanfan i sava lékol dann Cm1. Donk li la gingn in gran résitasyon pou aprann pou lindi. Kat éstrof pou aprann é pou résite.

Antansyon i tonm bien pars néna poète isi La rényon, in pé i di mèm sé lil bann poète. Donk sé pa sa k’i mank é d’apré zot in fonnkèr ousa zot i partiré rode ali ? Si pou aprann in fon d’kèr an fransé zot noré lanbara d’lo shoi. Zot noré lo shoi rant plizyèr dizène fonnkézèr ? Poète i mank pa nou : in pti lokont dé lisle, In pti Lacaussade ? In pti Jean Albany ? In pti Axel Gauvin…
Si zot, bann zamontrèr, konm i di bann moun konpétan-lo réktèr mèm li la di, alor i pé pa alé kont son réktèr, mé si an parmi bann zamontrèr l’avé inn dé té i yèm arienk manzé kui. Mi di si, mé mi koné la pa vré. An touléka, si zot lété tanté par luil tantan alé shèrch in fish pédagojik avèk in poèm i parl la nèj, lo bann pyé d’boi bransh touni, sak lé rapouyé, la fine dépouyé, lo bann zoizo i tranm avèk la fré, lo bann marmaye lo gibol i flajol, lo bann fèye mor antortiyé pa lo van. Zot i pouré pars bann fish de klass i mank pa pou anparl livèr boréal i komans arivé, avèk inn – dé flokon la nèz, épi lo van k’i apèl la biz.

Zot i pouré fèr sa, mé konm moin la di azot, avèk bann pèrsonèl kalifyé konm nou néna, sa sé in n’afèr k’i ariv ar pi… Sof l’ariv mon pti zanfan, li la gingn in fonnkèr Ann Schwari Henrich-zot i koné fanm-la zot ? moin non. Mé moin la fé aprann marmaye-la in foi, dé foi, dis foi, é li téi tronp lo mo. Tankamoin moin té i ariv pa rotonir sa. Donk moin la roganiz in dézyèm séans pou li ;, é in troizyèm pou moin. Li téi koné a popré sirtou apré in nuite somèye mé moin zéro kalbas la fimé gran-boi. Mèm si moin té i résite an aménan loto, an fézan mon bann kours, an dizan bonzour mon bann famiy épi mèm an shantan dsi l’èr zoiyé zanivèrsèr. Zéro, la ké mimite. !
L’èrla mi poz lo késtyon : sré t’i pars moin lé limité ké mi gingn pa aprann fonnkèr la ? Sréti pou sa sansa pars moin lé pa sifizaman alyéné ? Otroman l’amontrèz-la i anvé d’moin é d’mon famiy épi èl la déside pouri mon samdimansh ?.A n tou lé ka si lo shoi èl la fé i rolèv pa d’in n’afèr ni pé apèl l’alyénasyon, sirman sa i rosanm bien sa.