Lé ga, zot i koné lo G8 ? Souvan dé foi dann l’aktialité, i anparl dé zot. A s’ki prétan, zot sé lo uit pli gran péi épi bann péi pli rish nana dsi la tèr. Tazantan, zot prézidan i réini, épi ansanm, avèk zot i fé z’ot diagnost déssi lo mond, si i sava bien, si lé mol, si lé pli pir.

Donk in zour, zot la réini pou oir in pé si l’Afrik lé bien, sansa si lé pa bien. Bien sir, zot la trouv so gran kontinan-la lé malad. Pa partou, mé par plas, mèm in bon pé plas. Zot la di : « Nout tout ansanm, ni sava donn larzan bann péi l’Afrik ! ». Aprésa zot la diskité, ar diskité, ar-ardiskité, épi zot la mète dakor pou donn, an dé-troi z’an, vinn-dé miliar dolar (mi kroi sé sa !). Aprésa, zot lété si tèlman kontan, zot la anbras inn-a-l’ot.

Oui, mé promète sé in n’afèr, doné sé in n’ot z’afèr. Zordi la fine tir solman troi miliar, é manièr k’i sava, sar fine ariv la Sin-Glinglin, zot nora pankor done sak zot la promète. Sé sak inn-dé shantèr, an parmi Yannick Noah, la vni an Frans pou dir. Alor, gran prométèr ti donèr ? Moin, pou mon par, mi pans si sa i apèl pa mashann’parol, sa i arsanm bien. Fransh vérité !

 Justin