Somenn dèrnyèr, moin la ékoute in l’émisyon déssi la zénéalozi dann RFO. Sa in l’émisyon lé intérésan pou vréman. Demoun i poz késtyon déssi zot zansète... i domann ousa tèl nom i sort ? Kansa promyé moun té i apèl konmsa l’ariv issi ? Si l’ariv lib, sansa zésklav épi la gingn son libèrté apré ? Donkalor, zot i oi tousa z’afèr i pé amontr anou déssi listoir La Rényon kan i ékoute in l’émisyon konmsa.
Na dé foi, ou i antan kant mèm inn-dé z’idé i arsanm in pé révizyonist, k’i rann aou in pé malèz. Akoz sa ? Ala pou kosa ! Donk, moin l’apré ékoute lo lémisyon kan inn i di konmsa : « La trète bann noir la komans dann bann roiyome l’Afrik... Bann roi afrikin té i karsèr d’moun pou vann konm zésklav ». Aprésa, lo boug i arzoute : « Ala pou kosa, solon li, bann "roitelé" l’Afrik lété lo bann promyé résponsab la trète. Bann trafikan i vyin apré... ».
Sé in manyèr diminyé in pé la résponsabilité sak la roganizé épi sak la anrishi azot avèk lo komèrs lo "boi d’ébène", konm té i di sa. Sé konm in manyèr di, bann z’Afrikin lé résponsab an promyé dé zot maléré sor. Si sa la pa révizyonist, dizon sa i arsanm kant mèm !

Justin