Zot i koné méssyé Fillon ? Promyé minis gouvèrnman fransé ? A ! Zot i antrovoi in pé kissa i lé ! Oui, li mèm sa. Lo boug la promète la Réjyon fé pass in loi pou done lo tram-train La Rényon in konpansasyon férovyère… lo mèm ké la di, na inn-dé zour, konte pa dsi.
Zot i koné, sé li ké la okipe la réform la rotrète dann gouvèrnman Raffarin. Sé li k’la déklar dann télé, ké li la règ la késtyonn rotrète définitivman. Lété si tèlman définitif ké lété pa la pène toushé avan kok nora gingn lo dan. Si tèlman définitif, ké i fo arkomans sa sète ané… sansa lo sistème rotrète la Frans té riskab bate droite droite dann mir.
Donkalor, gouvèrnman la Frans la déside kass son tète pou trouv ankor in foi in solissyon définitif. Li la kalkil modifyé laz la rotrète... sar pi soisantan mé soisante avèk in shif déyèr mé la pankor di lakèl. Domann bann gro vaza vèrs in pti moné… mé i koné pa ankor konbyin. Mé sak lé pli jényal ; sé fèr travay bann rotrété... I apèl sa bann sényor, é si zot i travay an étan rotrété, zot nouvo patron noré poin kotizasyon rotrète pou péyé. La lé dos la ! Séryé in ! Sof ké bann patron i vé pa fé travay bann trayèr azé ! Sof ankor ké kan travay lé dir, lo rotrété la pa anvi artrap son gongonn soufrans !
Lé ga, mazine in kou so méssyé Fillon i kalkil in zour, dann son vir-vir, lo méyèr manyèr trouv lékilib lo rézime rotrète sré fé travay toute bann rotrété, ziska k’i mète azot rant kal plansh sapin, épi done sak i travay pa son sédik. Si sa lé pa jényal, mi apèl pi Justin !

 Justin 

NB : gongon la soufrans, sé piosh. Lo virvir sé lo délir.