La Rénion, nou noré di, sa in kabar mèm si kabar i éspas pa vréman konmsa. La-ba dann La Frans nora di, sa in sérémoni. Koman la apèl sa dann zétazini ? Mi ansouvien pa bien... épi bann télé i anbrouye si tan tèlman léspri avèk in kozé an langlé épi in kozé an fransé, lé dé an mèm tan... in trokaz langaz, la plipar d’tan.
Konm moin la di azot, moin la gard dann télé le gran kabar pou Obama, pou lo zour li fé sèrman sèrv konm ki fo son péi. Soir-la, lavé shantèr, lavé bann pastèr apré fé z’ot prédikasion, lavé lo prézidan k’té i fé diskour pou donn dé-troi lindikasion déssi la politik li sava fé pandan in koup de tan : katran, si mi tronp pa ! Tousala té an langlé é in moun té la pou tradui an fransé ; inn-dé foi ou i an apèrsoi, nana dé shoz i vé pa di lo mèm zafèr, konm in gout delo i arsanm in gout delo, topète-morète, sigarèt, boi d’zalimète... Alé, i fé pa rien, lès kasé !
Lavé in n’afèr, moin pèrsonèl, mi trouv té valab : in madam, sak i paré bien koni dann son péi, la lir in gran fonnkèr. Alor, d’apré zot, kosa la éspasé ? In moun la traduir lo fonnkèr ? In-in-in mounoir ! La zis fèrm lo také lo madam épi in zournalist la mète a dir konm li la konpri lo prédikasionn’ Obama.
Ossi outor, résite fonnkèr kant in prézidan i prète sèrman : sa la pa sérié ditou ! Té valé mié, ranplas lo fonnkèr par in mové rézimé... A ! Bann télé La Frans lé for sa... In ! Mé fonnkèr, mi pans, i doi fatig z’ot tété. Épi, kisa i sava armark in n’afèr konmsa ? Pèrsone bien sir... Sof sak i em bann poèm, bann fonnkèr... Nana ankor dmoun konmsa ? Arienk si nana é pa solman issi La Rénion. Alor, nar pa été mié traduir son poèm, sansa lès aèl résité, konm sak la vouli shanté, la shanté ! Mé la pa sa : sak résite : fonnkèr ? Alor, i fo koup ali !

Justin