Nana in bon pti pé d’sosiété i sèy ède in pé sak na poin lo pourkoi konm k’i fo, kansréti pou an avoir sak lé pli nésésèr : manzé pou ranpli lo bouzaron, inn-dé linz pou pa marsh dann shomin konm Èv-é-Adan, in kaz pou arète dédan, mèm in moné pou donn demoun i loz aou gratuit. Nana in bon pti pé i fé sa, é lé bien, pars i fo dir, la solidarité sé in bon règleman dan la vi.

Biensir, mèm in sosiété i pé pa donn sak li la poin : i fo li domann tèl moun, tèl komèrs, tèl magazin sak i fo pou dépann demoun. Sa, toulmoun i koné, é lé bien zantiy sak i donn in pé mèm si li la poin plisk’i n’an fo pou li-mèm, é si li déside priv’ali déssèrtènn shoz.

“Momon-papa lé la” : toulmoun i koné sosiété-la ? É bin, li la trouv dé tik-tak lé pa parèy sète lé z’ot. Inn, li la loué in bout la tèr pou demoun planté, konmsa apré, i partaz lo rékolt rant sak la bézoin... In dézièm téknik lé intérésan galman, sé fé dékonpoz bann déshé épi fabrik konpost par bann vèr d’tèr. Pou linstan, i fé léspérians, mé akoz i gingnré pa fé pou vréman an kantité ?

Sa la pa premié nouvèl pou sak i suiv in pé lékolozi pars na lontan i fé sa. Mé si i fé sa dann péi déor, akoz pa issi : akoz pa ? Épi, lé bon pou dévlopman dirab. Donkalor, lé bon pou nou, lé bon ossi pou limanité, pars si sé in bon légzanp, akoz pa émité ?

Justin