La kriz ? Sa sé in n’afèr i ariv souvan é shak foi ni di si l’avé aplik lo plan Paul Vergès. Mi rapèl lo mank de ri kan l’ariv la guèr dann l’Irak, mi rapèl ankor la kriz do luil avèk in pri dvante inkroiyab ; la kriz léssanss ébin sa i ariv souvan. Opliss v’alé, opliss nou va trouv bann kriz nou lé pou arien dedan mé li va fé soufèr anou.

Arien dedan ? Sa i vé pa dir nou la fé tout sak i fo pou k’i ariv pa é si i ariv ni gingn zigil ali… Nout kamarad ary l’apré parl lénèrzi bon marshé é sa lé possib mé lotonomi énèrzétik sé kékshoz an pane koméla.

Ala mon késtyon ! nou la fine kozé dopi dé zané dsi bann solission lé bon pou nou é nou lé kontan in kriz i amontr nout parti na rézon, bann kominiss la rézon. Ok ! Mé kossa ni fé pou fé rant dan la réalité bann solission nou la fine trouvé… Ni fé pa sak i fo fèr é ni invite pa assé nout pèp dann shomin-la.

Mézami tazantan nou néna lénèrji pou lé shoz ké nivé. In légzanp : l’égalité sossyal sé kant mèm nou k’la fé avanss sa bien konm i fo… Ni pouré galman anparl la lang kréol ? Zot i panss pa npout parti la fé avanns sète afèr-la ?

Alor nou néna dé solission ; alon angaz la bataye pou fé avanss nout bann projé é an mèm tan ké nout parti i ropran favèr dann la politik.

A bon antandèr salu !

Justin