Mézami, mi koné pa si zot la zoué sète éspèss zé an kouyon téi apèl lo zé patate sho ; li lé sinpe : wi trape in patate sho é wi anvoye sa pou oute kamarade vitman san ké li oi kossa i ariv. Kan li trape i bril ali. Donk in zé kouyon, mé nou la zoué sa étan pti.

Astère konm zot i koné, dan la vi, néna bonpé patate sho. Bonpé lokazyon ète pri dan la kol zak é souvan défoi sé oute méyèr kamarde i foute aou dann in ponpe konmsa. Méfyans ! Méfyans mézami. Sak i fé sa, i vé pa out bien pou vréman.

Alé ! mi kite azote rofléshi la dsi é ni artrouv pli d’van. Sipétadyé.

Justin