Matant Zélida la ékrir justin :

Mon shèr nové, mon spès salté, rouj-de-fon dovan l’étèrnité, mi sort antann in ansien rouj avèk zot dir dé shoz é bin moin la bate la min pars pou in foi li la bien rézon dann son kozman dann télé. Kosa li la di, Li la di, lo parti rouj lé angajé dann in bataye pou défann son l’idéolozi. Pou li sa lé vyé stil. Pou li sa la pa modèrn é an pliské sa sé pa sak lo pèp La Rényon i vé. In l’égzanp, I sava parl ankor la lite dé klas ? in n’afèr pèrsone i kroi pi : kaziman i fizy san bal, kaziman i pistolé dolo. Tok ! Pran sa pou toi !

Justin la fé pou répons :

Mon vyé matant, k’i koz la boush rouvèr, vi kroi moin la tyé kouyon pou pran son plas ? A bon, demoun i kroi pi la lite dé klas ? Poitan in sondaz i sort parète dan La frans i di nana soisant-dis pour san d’moun i pans la lité dé klas nana in gran l’inflians dsi z’ot vi, zot i amenn tou lé zour. Donk ou i oi bien matant ké outane sé inn bourik.

Dsi la késtyonn l’idéolozi, kosa i lé sa ? Sé sinploman la filozofi k’i port nout program dé lite. I di pa i sava lans partou : ni vé vanj pou l’idéolozi la klas ouvriyèr ! Non mé sa i vé dir nout rovandikasyon mèm sète ni fé koméla, sé pou amenn anou dann in sosyété pli zis, pli imène, pli dévlopé, pli libéré épli rényoné…

In l’égzanp : kan ni di i pé pa antèr bann plantèr kann konmsa ni vé dir i fo sov lo rovni plis dizui mil famiy. Sa sé in kékshoz bien konkré, é bien nésésèr pou nout péi La Rényon ! Si sa sé l’idéolozi nout parti ébin viv l’idéolozi nout parti ! Tok ! Pran sa pou ou.