Mézami yèr matin bande média la rodi ankor néna 116000 pèrsone an parmi sak l an az pou konète lir épi ékrir i koné pa bien lir épi pa bien ékrir. Pou mwin, konm lété lo zour pou lite kont lilétrism mi panss bande média lété dann zot rol. Sof ke lo moune zot i apèl ilétré, dan sète afèr, i pass in pé konm koupabe alé oir pou mwin zot lé viktime an promyé.

Dabor, mi romark dèrnyé foi l’insee la fé in lankète la dsi i romonte lané 2016, donk néna sinkan, é dopi ané apré ané i anons touzour lo mèm nonb par in kalkil lo bienfondé i éshape amwin in pé. Aprésa, biensir bande radyo i ankouraz bande lou pou irlé é lo bande banna i apèl ilétré, zot famiy – noute band konpatriyote-i pass pou dé moinss ké rien, bande bashèr lékol la pa vouli fé léfor k’i fo pou aprann lire épi ékrir.

An inn zourné, lo bande viktime la shanj an koupab zot épi zot famiy.. Mézami zot i panss pa sa in vilin défo issi La Rényon, In vilin défo kan i mète an akizassion bande moune i toush lo RSA, demoune mizèr-an touléka sak lé an dsou lo pa d’porte a povrété-arzoute èk sa bande mal lojé, bande viktime lalkolozassion fœtal é toute sak i s’ansui.

Zot i panss pa noute bande konpatriyote viktime, i mérite in méyèr trètman ké sa, in pé la konpréansion, in pé lanpati konm i di sa ? Plito k’i mète azot o ban la sossyété. Plito ké bande portère lidéolozi réaksyonère i tonb dsi zot do konmsa.

Dë pti mo dsi lédikassyon bande zanfan : i di i fo mète lanfan dann ron lo dispozitif lamontraz. Dakor ! Bien sir ! Mé sa lang, sa kiltir, kissa i anparl.kèl plass zot néna dopi lontan. Lanfan rényoné kréolofone li lé dann ron d’arien ditou. Donk pa koupab, mé viktime, sans pour san viktime. Taka bande i sa i irl avèk bande lou fèrm zot také siouplé

Assé pran bande viktime pou koupab, assé lé pliské tan ké sa i arète.