Matant Zélida la ékrir Justin :

Mon shèr nové, mon spès salté, mi sava dir aou in n’afèr, i fé plézir amoin aprékou, mé la bien fé pèr amoin dsi lo kou. Ou i rapèl lo pti kou d’konférans la fé dann la méri Sin-Dni ? ébin landmin moin la lir dann zournal soir-la tout la gosh lété rasanblé, lété a tu épi a toi konmsi lo bon vyé tan téi arive ankor in kou.Moin la rèss kamu pars moin la pans lété vré pou vréman é si té vré pou vréman, lété riskab an avoir in n’ot rapor d’fors ké sak ni pans konète zordi. Moin la majine lo tan parti kominis lété tro roprézanté-solon mon avi- an parmi bann zélu.Rozman la pa pass in bonpé l’tan pou madame Bello fé romark èl i manz pa mèm tab ké bann rouj-de-fon.Kan tout sak i apèl la gosh lété rasanblé l’avé inn té dovan la port é mi diré mèm konsidéré konm in péstiféré é lété lo parti bann rouj-de-fon.Moin la réspir in gran kou é mi pans out koté ou la mank toufé-di la vérité !Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, mi pé dir aou shakinn i tir son satisfaksyon ousa li gingn.Pou out par mi pans ou i nouri aou avèk toutsak ,solon ou, i ariv de mal pou lo parti kominis.Shakinn son manjé !Shakinn son plézir !

Moin pèrsonèlman mi rogard plito koté d’sak i amenn zidé pou ansèrv lo pèp rényoné é néna dé shoz i bote amoin é d’ot i bote pa moin-mi vé parl lo piyaz nout zidé pou détourn ali par rapor so lobjéktif..Kan i di lo sistèm ni koné i doi zète shanjé pars li lé fine ariv dann boute son souf ébin sa sé in n’afèr i bote amoin, konm moin lé sir i bote in bonpé rényoné.I fo shanj braké ?OK.i fo shanj lojisyèl ?Ok !Pari i komann pan ou ?Ok.Astèr kosa i mète a la plas é sé l’èr sak i aport zidé i diriz la pyès ;d’apré moin !Sé l’èr, momandoné bann rényoné i pé an avoir in réaksyonn rojé par rapor sak i éspass shé nou , dopi in pé tro lontan.

Kosa i fo mète a la plas : la résponsabilité pou bann rényoné avèk lo dévlopman, avèk ankor in shanjmann sosyété, avèk an plis la ibérasyon pou l’idantité rényonèz épi la libérasyon sosyal.Astèr kan mi oi désèrtin i kabr dovan l’obstak ébin sa i fé pa moin plézir.Kan mi oi désèrin i kapar i pé zidé parti kominis, mé i tranm dovan graton pou bann zidé fors son program, sé l’èr i fé pa plézir amoin ditou, pars sé lo péi, sé lo pèp lé lésé san solisyon-la pa la klass politik.Finalman bann rényoné i s’anfoutsa.

Astèr mon vyé matant m’a dir aou in sinp fraz moin la antann dan la boush lo mèr Sin-Dni.Figir aou li la di parti kominis sé lo pli gran prodiktèr d’zidé é souvan dé foi lé z’ot i piosh dedan.Si tèlman si téi gingn droi d’otèr pou lo bann zidé politik, parti kominis nora té rish a l’èr ki lé.Tok ! Pran sa pou ou !

Justin