Oté

« Si toultan wi koz sanm ou kansa ou koz èk lé zot » 

In kozman pou la route

Justin / 15 mars 2021

JPEG - 43.6 ko

Méssyé, médam, la sosyété koze èk mwin sé koze èk in kouyon, mé sé o pyé d’lo mir k’i oi lo vré masson. Mézami, mi koné pa si konm mwin zot la romark in n’afèr : in tan dan la vi wi mète a koz èk demoun in bonpé, é in tan wi mète a koz avèk ou mèm-sansa wi koz dann out kèr, san koz k lo moun. Sé in n’afèr mi pans i ariv bonpé d’moun, alors mi dmand amwin pou kossa : pé sfèr la pèrsone i koz in bonpé avèk lé zot i romark in zour èl la obliye koz avèk èl mèm lo pé k’i fo. Pé sfèr èl la romark in zour èl lété fine ranpli son magazin kozman, la syène é sète lé zot, é astèr i fo fé l’aproptaz : bien klassé, bien mète shak kozman son plass, épi ossi trouv lo sans sak ou la di sansa sak ou la antann. Pé sfèr ossi lo tan lé vni pou mète bann kozman an sirkonstans : kissa la di sa, poukoué la di sa, kossa l’avé arivé zour-la, kossa l’avé pa arivé. Sé sa d’apré mwin i vé dir mète lo kozman an sirkonstanss é si néna bokou, i mète lo tan. Si tèlman ké ou na pi l’tan pou koz èk lo moun. Mi koné pa si ni doi souplègn pou sa, sansa si ni doi kontante anou d’sa, mé lo travaye la dsi sé in travaye bien nésséssèr ; Alé ! mi kite azot rofléshi la dsi é ni artrouv pli d’van. Sipétadyé.