Matant Zélida la ékrir Justin :

Mon shèr nové, mon spès salté, rouj-de-fon divan l’étèrnité, éskiz amoin si mi rovir ankor in kou dsi lo sékirité alimantèr. Pars moin la konm konpri zot lé pa pou transform Madégaskar an far-far do ri pou tout bannzil l’oséan indien a komansé pou La Rényon. Poitan moin la bien antann madam dindar di k’èl lé pour. Moin la galman antandi dir sa sé in prozé k’i rant dann program la COI (komisyon l’oséan indien). Mèm La frans lé pou sa é mi dout pa ké La Chine épi l’Inn lé dakor galman. Donk mi pans, si toulmoun lé d’akor afèr bann rouj pou z’ot par zot lé pa d’akor. Sirman ké zot lé abityé a an avoir tor é lé z’ot rézon. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, ankor in kou, out kozman i rosanm aou. Pou kosa mi di sa ? Pars lé pa forsé kan in bann mouton i fé bééé, ou lé oblizé fé parèy. La pa oblijé si toulmoun la tor, i fo ou la tor galman... In n’ot afèr i sort donn anou rézon : dann Vietnam na in réjyon i plant in kantité do-ri. Ziska troi rékolt dann l’ané… Ala pa ké sète ané gouvèrnman la domann bann plantèr pa plant do ri koméla, komans planté moi d’mé an rézonn lo réshofman klimatik la dérèg lo tan. Moin la fine parl dsi siklone Madégaskar : sa nana tou lé z’an vi la fason li lé disposé dan l’oséan é vi son grandèr é siklone-la, sa i fé déga zot i koné bien. Alor, mi pans ni doi pa suiv tou lé z’ot, ni doi an avoir nout prop politik dann la prodiksyon manzé. Tok ! Pran sa pou ou !