Médame, Méssyé, la sossyété, koze èk mwin sé koze avèk in kouyon, mé sé o pyé d’lo mir k’i oi lo vré masson.

Mézami, mon bande dalon, kozman-la mwin la tire dann bande provèrb l’Afghanistan mwin la pyosh dossi lo linternet. Mi yème bien kozman-la, pa si tèlman pou son sanss prope : sanss prope lé intéréssan pars i sirpran amwin touzour pars sa i fé panss amwin Zistoir Pinocchio, épi sa i rapèl amwin bande pti zouzoute an boi in vyé zami la famiye téi fé kan li lété apranti-ménuizyé-Dann tan-la téi fo pa gran shoze pou bande marmaye amizé, mé lo pa granshoze lété in zouzoute an boi.

Mé son sanss figuiré, mi trouv sa lé intéréssan pars si wi fé in n’afère i fo pa wi atande aou in rézilta lété pa prévi. Sak ou la fé ou la fé é wi kontante aou avèk sa… pou lo rèst wi pé révé épi fé travaye oute mazinassion : an rèv, kossa nou la pa fé kan nou lété marmaye ? Koméla wi pé fé in shate konékté, mé sé pa oute mazinassion k’la travaye sé sète lo konséptère. Finalman kossa ni pé proféré ?

Mi kite azot rofléshi la dsi é ni artrouv pli d’van. Sipétadyé.