Médam, zé Mésyé, la sosyété, pèrmète amwin mète azot an gard ! Di azot kozman mwin la mark zordi lé vré mé pa san pour san. Pars si lété vré san pour san nora sifi pa konète in n’afèr é rokonète mon l’ignorans pou mwin konète, mé la pa ditou konmsa ! I fo mi koné mi koné pa é aprésa i fo mi sava aprann. Konbien zafèr moin l’aprann konmsa é ziska zordi mi koné pa ? An parmi sak mi koné pa néna sèk mèm bann savan i koné pa, l’èr-la si mwin lé pa kontan mi pran konstan épi mi kontant amwin. Néna sèk bann gross tète i koné é la pa sir moin lé kapab konète ali, lé pa sir mwin lé kapab aprann ali. La konésans mé zami, la pa in gran flèv trankil. Sa i révèye pa zot souvnir lékol sa ? Mwin oui, pars i pass pa d’zour san ké mi rapèl in sityasion léshèk kisoi lékol, kisoi l’inivèrsité. Alé ! Mi kite azot rofléshir la dsi é mi di azot pèrd pa kouraz. La konésans la pa in tapi zoli flèr san bon. Ni artrouv pli d’van. Sipétadyé !