Kissoi bann z’ofissyèl k’i rokoné noute kiltir épi noute lang i doi pran la plass k’i mérite ali dann la formassion noute bann marmaye, épi dann la rokonéssans noute kiltir épi noute kiltir épi nout lang konm lang épi kiltir d’in pèp rényoné : kan in miniss la répiblik i parl noute lang épi noute kiltir ni pé mèm mazine nou lé angajé dann in bon shomin an téori pars an pratik néna ankor bokou pou fér.

Parèye kan ni antann bann sindika l’édikassion nassyonal, épi lé roprézantan bann paran d’zélèv, nou bann militan kiltirèl ni di an nou-mèm nou la fé plizyèr pa an avan pou mète anlèr noute kiltir épi noute lang…Mèm bann politik i done anou léspoir oir noute kiltir épi noute lang okipe la plass i mérite .

Alor pou kossa mazine oussa nou lété yèr pou kalkil oussa ni sava domin ?

Pars ni koné pa bien bann konvèrti épi la fors zot konvikssion. Ni koné lé n’ote, é ni koné ossi koman lété dir trape noute shomin, ni pé dir zordi galizé….Mé ni antan dir tèl plass-tèl plass, dann tèl Lissé osinonsa dann tèl kolèz lé shoz i spass pa konm ni voudré . Ni konstate dann la vré vi ofissyèl néna ankor in gran dékalaz rante la téori épi la pratik.

Yèr dann télé mi antan in madam apré ésplike in prézidante l’assossyasion bann paran d’zélèv, partizan lo kréol dann lékol, koman kan èl lé parti an franss la métrèss téi done aèl la résponssabilité koriz bann fote lortograf épi la gramèr bann ti zorèye téi fé –toussa pou dir langajman lékol dann kréol lé pa nésséssèr pou la réissite bann zanfan noute péi. L’èrla mi di dann mon kèr bann vyé zidé lé la, é kissa i pé dir si zot lé pa ankor vivan ?

Rapèl bann konba nou l’amenn yèr,pou ranporte bann viktoir domin.A bon antandèr,salu !

Justin