Oté

« Si wi kroi toute sak wi lire, otan pa lire ditou »

In kozman pou la route

Justin / 4 séptanm 2021

JPEG - 43.6 ko

Médame zé Méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo masson.

Mézami, lékol mwin l’avé in bon kamarade é kamarade-la téi di amwin souvan : « Ou lé kontan pars wi koné lire, mé lire sé koi ? ». Alor li téi di amwin an vantar : « Lire sé koze par ékri é pa pliss ké sa. ». Mwin la kalkil lontan kossa li téi vé dire par-la, li ké la zamé vouli lire. Pa par kouyoniss, mé par konviksyon ! Koméla li lé pi la, mé kan mi kalkil son kozman mi antrovoi sak li téi vé dire. Li téi vé dire amwin mi done bonpé linportanss la léktir, mèm mi oi sa konm kékshoze sakré. Alé oir an kozan wi pé di bon zafère, konm mové zafèr. An lizan, wi pé lire bon zafèr konm mové zafère, zafère vré konm zafère mantèr. Kan wi ékri lé parèye…

Alor lo sèl solission sé la rofléksyon épi ossi vérifyé sak wi lire, sansa sak wi antande. Mé lo pli gayar dann toussa sé k’in zour mwin la bite dsi li é lo tan l’avé passé é toulézour li téi ashté zoinal. L’èr-la mwin la rapèl ali son kozman kan nou lété lékol ansanm. Li la réponde amwin, in pé énèrvé : « wi kroi mi kroi toute bande mantri néna dann zoinal ? ». Mwin la pa di ali arien, mé dann fon mon kère mwin la panss li konm mwin, konm d’ote ni lèss anou trapé, alyéné, roulé dann la farine. Mé sa i apèl l’informassion : kroi, kroi pa, li viv san nou é d’moune la gran bézoin sa.

Alé ! mi kite azot rofléshi la dsi é ni artrouv pli d’van. Sipétadyé.