Mézami, moin lé sir zot I koné kozman-la, sak i di : « Promèss sé dète ». Promess ? Nou kréol ni koné kossa sa i vé dir. Kisa rant nou la pankor fé in promèss, kisoi pou la vyèrz noir, kisoi pou Sintéspédi, kisoi ankor tout kalité Bondyé néna dsi la tèr. Ebin bann zansien i mète an gard lo prométèr pou di ali i fo réspèk son promèss. Astèr néna galman bann promèss rant demoun vivan : momon mi promète aou bien travaye lékol ! Papa mi promète aou viv sèryèzman dorénavan épi a partir. Kozman lé marké an-o la, i fo bien avèye si wi fé sa in zanfan, pars bann anfan i konpran pa kan in gran moun i réspèk pa son parol é souvan défoi wi pé pèrde out préstiz par raport bann zanfan é aprésa, étone pa si lo zanfan lé déssu d’la vi. Alé ! Mi kite azot rofléshi la dsi é ni artrouv pli d’van. Sipétadyé.