Mézami mi rapèl ankor zordi kozman mon momon kan téi di amoin : « Justin mounoir la pèrféksyon la pa po issienba » é moin téi trouv èl l’avé rézon, san foi rézon. Sèryèzman in késkéssé i pé z’ète plézab, i pé an avoir bon tanpèrman, i pé yèm aou konm koshon i yèm la bou, mé néna inn-dé poin ou va touzour trouv a rodir. Amoinské ou lé amouré konm in shien pou in zos pars l’amour i rann avèg mé normalman in moun sé i ramassaz kalité épi défo galman. Si wi oi pa l’bann défo zordi, ou va oir domin, sansa wa oir aprédomin. Sa sé la loi la natir sa ! Kan dé pèrsone i dispite in kou, ala inn i di l’ot : « Ma fiy sansa mounoir, moin noré zamé di ou lété konmsa ! » ? Donk si ou i rode in késkéssé, é si ou i trouv inn lé akséptab, ou na ka kass l’anbordir : « Inn+inn i fé la pèr ». Ou néna défo, l’ot néna défo ; ou néna kalité l’ot nosi néna. Fé roulé Férèr. An atandan, mi kite azot rofléshi la dsi é ni artrouv pli d’van. Sipétadyé.