Médam, zé Méssyé, la sosyété dopi in bon koupe de tan mi koné kozman-la é mi pé dir azot néna in bonpé sityasion konmsa é ni fé pa assé antansyon lo risk ni pran a frékante déssèrtin moun, déssètènn lantropriz, déssèrtin zélu, é mèm déssèrtin péi. Pars néna d’moun lé pa katogan, konm néna dé lantropriz pa katogan non pli, épi dé zom politik i f opa fyé d’su, parl pi pou déssèrtin péi. Mézami provèrb-la si ni kalkil bien son tonan épi son l’aboutissan i konsèye anou la méfyanss, épi la pridanss, é i di anou néna dé frékantassyon k’i fo évité pars ni pé dir néna danzé. Mé néna in problèm : lakèl solon zot ? Sinploman in gran difikilté pou démaye rant lo vré épi lo fo toussa par raporte in spèss guèr psikolozik : kissa i di anou sak lé frékantab é sak lé pa frékantab ? Nou lé bien sir lo répitasyon ké l’moun i fé pou tèl pèrsone, tèl lantropriz, tèl péi lé zistifyé sansa lé pa. Koman ni fé pou sépar lo bon grin avèk l’ivré ? Nou lé sir l’opinyon la pa apré foute anou d’dan dsi la késtyonn la réalité épi lo l’imaz bann partnèr, bann zadvèrsèr, lo soidizan zami é lo prétandi zènmi. Alé ! mi kite azot rofléshi la dsi é ni artrouv pli d’van. Sipétadyé.