Mézami, provèrb mwin la mark an-o la, sa in provèrb l’afrik, mé konm mi di souvan défoi, sak lé vré la-ba, lé vré issi é pétète lé vré in pé partou. I vé dire sinploman ziz pa d’moune tro fassilman. Pran lo tan é momandoné ou sar kapab konprande ali épi porte in ziizman dsi li avèk son bon koté-pars néna touzour – épi son mové koté – néna konm pou pou l’moune.

Marsh dann son savate i vé dir an gro viv konm li viv in boute lo tan. Aprann a konète kossa li fé pou vréman. Sak lé fassil pou li, konm sak lé difissil é in n’afèr konpliké, koman konète lo pou kossa. Pou kossa li la fé si, pou kossa li la fé sa, pou kossa li la pa fé si, pou kossa li la pa fé sa. Ou mèm son plass kossa ou nora fé ékossa ou nora pa fé ?

Réponde pa tro vite, pars ou nora pa gingn lo tan soupèze lo pour avèk lo kontre.

… san éskizé, san trouv bon forsséman, mé si ni pé dire an rolativizan pars toute lé rolatif dan la vi. Ni pé di : toute lé par rapor, par raporte lé z’inn, lé z’ote, par raporte ou mèm. An kalkilan bien la pa ariv anou kondane in moune in zour pou konprande in takon lo tan apré lo moune lété pou arien ? Sirman l’arivé.

Alé ! Mi kite azot rofléshi la dsi é ni artrouv pli d’van. Sipétadyé.

Justin