Médam, zé mésyé, la sosyété,koz èk mwin sé koz èk in kouyon mé sé o pyé lo mir k’i oi lo bon masson. Mézami figuire azot sé dann zistoir Tikok Christian Fontaine la ékri, ké mwin la lir in kozman konmsa. Sityasyon : in moun la sort La Rényon pou fé in sézour dan La franss. Arivé laba, li la komanss fé la fète, la fé in pé lo galan si tèlman k’in madam laba dan la franss la komanss fé ladi-lafé dsi son kont avèk son madam rèsté La Rényon. Normal !Lo fam la romark li té tanté par luil tantan é la panss lété bon pou fé in pti ladi-lafé. Zot i koné dann nout péi la Rényon ladi-lafé sé konm in éspor nasyonal... é pa arienk pou la késtyonn méssyé-madam mé po d’ot zavantir d’la vi.Alé ! Mikite azot rofléshi la dsi é ni artrouv pli d’van. Sipétadyé.