Médame, Méssyé, la sosyété, koze èk mwin sé koze èk in kouyon mé sé o pyé d’lo mir k’i oi lo vré masson. Mézami, mi panss si zot lé rényoné normal zot la pankor kongn zote doi d’pyé ké lo san la fine koulé é ké la lang la fine komanss rakonté. Défoi kan wi antande in pé d’moune kozé ou néna konm dan l’idé zot néna toute traka dsi zot, réini dopi la kréassyon. Poitan si ni kalkil in kou, ni pé domande anou pou kossa ni rakonte nout traka : pou diminyé ali ? Mi panss pa ; an kontrèr ni mète ali an démiltipliyé. Pou okipe promyé plass dann ladi-lafé ? Mi panss pa non pli. Pars lé zote i fé konmsa ? Sé in labitide dan nou alor ? Mézami sé in mové labitide pars sak i pé ariv anou de myë sé ké ni dovien in sizé d’konvèrsassion sansa ni pé kontante bande mové lang- kèr . Pars fransh vérité, si ou néna in n’afèr pou dire, bon konm pa bon, i fo wi trouv in zorèye akéyan pou rakonte sa é zafèr-la sa la poin partou. Antouléka, mwin nora prévni azote é zot i pé rofléshi la dsi. Alé ! Ni artrouv pli d’van, sipétadyé.