Partir zordi ziska dézormé inkli, kan zot va ashète in laparèy ménazé, zot nora moiyin ramène lo vié pou pran in nèv. Konmsa zot sar pa annuiyé avèk sa épi zot sar pa oblizé, an misoukant, alé zète lo vié dann in désarz kékpar. Mèm zot va pèy in taks , dizon i pé oir sa konm in bon mézir.

Sof ké noré pi fé linvantèr tout bann déshé éléktrik épi éléktronik, prévoir issi-mèm bann lantropriz pou trète bann déshé-la. Nora pi fèr in manièr pou donn demoun in métié épi in travay. Nou va arkoz la-dsi, mé mon lopignon sé k’i trét anou konm konsomatèr tou-kour, pa konm prodiktèr.

Sof ké, lé riskab anvoy bann déshé avèk tousa poizon nana dédan la-ba la Shine, dann l’Inn, dann bann péi Lafrik akoz la-ba i rovien pa shèr. Bann moun i travay la-dan, la poin protéksion, i anpoizone azot in pé plis toulézour, épi i larg sa dan la mèr, dann bann rivièr épi dan la natir.
Alors, moin lé sir zot noré rogré raport zot vié l’aparèy, si zot i konétré oussa bann déshé-la i sava épi lo déga l’apré fé.

Justin