Si mi di azot mon kèr i sègn kan mi oi la rout an mèr kaziman éstopé, lé posib zot i kroi pa moin. Pétète zot va kroir, konm moin laté touzour kont in rout konmsa,kan mi oi léta li lé d’dan moin lé kontan,mi rosan jouisans é konpagni mé bien antandi lé pa vré.

Si moin lé kontan sé pou tout lo déga nout péi épi nout lanvironeman la gingn évité ziska zordi.Pars zot i koné konm lo shéma d’karyèr lété sanksyoné par tout la shène bann triinal,la pa domin la vèye zot va gingn rolans l’afèr konm zot i vé fèr ziska zordi.

Biensir lo promyé koupab sé Didier Robert avèk tout sak la apiye son rin pou fé sak li la désid fé.Son lantouraj pintade pou son par, li galman, li lé résponsab.Dakor ! Mé lé zot ?

L’éta épi son roprézantan sir plas i apèl lo préfé :léta la zamé vouli rogard do pli pré lo projé pou oir si li lété fézab, an touléka si téi tienbo la rout késtyonn finans.L’éta épi son roprézantan sir plas la pa tienbo kont lo bann romark bann mouvman dsi l’anvironeman.Koman zot la fé, dann in pèryod, lo patrimoine natirèl lé an danzé konm li lé, lèss fèr in n’afèr konmsa san tienbo kont lo bann voiyan o rouz.Néglizans sansa konplisité ?

Ni pé kant mèm anparl in pé lo bann zélu é konm zot la ézite pou kondane in prozé konmsa .Si bann zasosyasion l’avé pa mélé, nou lété frite.La pa zot mèm la di i fo pa rokomans lo projé pars li lé fine kout déza shèr é si i pran in n’ot diréksyon va kout ankor pli shèr.Sé sa zot kouraj politik ?Sé sa zot foi dann lékoloji ?Sé sa zot manyèr fèr an fas in gran risk pou bann rényoné ?Parl pi la komisèr éropéene é sak èl la fé : mi pans , si in zour lé posib, i fo fé in shapte pou èl épi pou son bononm téi travaye dsi la rout an mèr.

Sèryèzman, tout rényoné normal lété fine konprann sète afèr-la i tien bpa la rout é bann z’asosyasion osi l’avé konprann sa.Mé koman alé détèr la ash de guèr kont in moun la fé bate Paul Vergès ? La rokonésans pou zot gro kèr ?

An touléka, mésyé, mé dam, la sosyété, kan zot va rogard azot dann in glas, pé s’fèr zot i oi pa lo koupab, mé sirman zot va oir son konplis.

Justin