Astèr si ni kalkil in kou, ni di rézisté mé rézisté a koué. Rézisté par raporte la boue, dolo, lo van, radmaré , pars in siklone sé toussala an mèm tan é sak nou lé fine konète dann siklone i amontre anou i fo pa fé tro fé lo fyèr avèk la natir.Sirtou si l’om lé fine pass par la pou détrake aèl.

Na poin lontan mwin téi ékri azot dann mon modékri : in pé i di bann météor natirèl lé riskab d’ète pli rar mé an mèm tan pli for é mwin mon koté mi di lé riskab d’ète pli for é pli nonbré pars sé sak ni pé konstate zordi.

Alor in pé i di, i fo ni prézèrv anou toute bann konsékanss siklone kissoi pou la konstrukssion, kissoi pou d’lo, kissoi pou la mèr é son bann radmaré, kissoi ankor pou tranbléman d’tèr, osinonsa tsunami mé si ni pé ésséyé lé pa sir nou va réissir.La prèv bann supor bann lign ote tanssion : okin landroi sa la fine tonbé sé dir si l’EDF néna konfyanss, mé linkroiyab té vré é bann lign ote tanssion dan l’est la sédé é lé pa fassil d’ète réparé.

Alor si lo van i mète a souf pli for k’la zamé souflé ? Si ni pran prékossion é si sa i ansèrv pa gran shoz ? Alon fé konfyanss bann zinzényèr épi bann syantifik. Alon fèr konfyanss galman noute bon sanss pars souvan défoi li lé pli éfikass ké bann téori fimante, mé sirtou alon pa obliye bann fénomène natirèl sa lé pli for ké nou é i fo ni pran prékossion… Mèm si sa i sifi pa.

A bon antandèr salu !