Médam zé méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami, souvan mi antann de moune apré dir la pa larzan i manke anou issi La Rényon. Sirésèrtin toulézan issi, shé nou, néna in bonpé milyar i sirkil si tèlman k ‘in pé i panss konm néna i sifi d’trapé.

Fitintan mwin téi panss téi sifi d’roul galé pou trape-pa larzan !- l’or dessou. Mi rapèl kan mwin té i rèss Boi d’Nèf avèk inn-dé kamarade nou téi roul lo rosh pou trouv l’or é nou la pa trouv jamé, bien antandi !

Mi trouv lé pli fassil dépanssé ké pou gagné. Néna in kozman i di konmsa « posh na trou ! », « sansa » na lo trou dan la min ! »... Mi panss néna in kozman k’i di sak mwin la marke an-o la é sète-la lé pli vré.

Mwin pèrsonèlman, mi invite azot bien rofléshir dsi kozman mwin la marke an-o la ârs néna sirman bann règ de vi pou diskité ldan.

Alé ! ni artrouv pli dvan, sipétadyé.