Oté

Siklone l’arivé ? I diré oui konm pa

Justin / 18 zanvié 2018

JPEG - 43.6 ko

Dopi dimansh bann média l’apré basine anou dsi késtyonn siklone la. In pé i di zot la rogard la kart é la kart lé sir a san pour san é siklone i sar pass dsi nou, kaziman konm in roulo konprésèr : i sava tyé sète, blèss katorz. Kansa ? Zédi matin dizèr ! Pars antansyon, koméla siklone lé prési, réglé konm papyé d’mizik é li réspèk son z’èr li la done ali par li mèm sansa bann la météo la donn ali dann sak i pouré z’ète konm in kayé d’sharj.

Lontan siklone laté pa konm koméla. Li té i pran son tan. Bann vyé moun téi rogard l’éskargo grinp dsi lo mir. Mové prézaz : l’éskargo i komans avoir pèr noiyé. Fourmi k’i pik i rant partou é si ou la marsh dann son ni, antansyon son vénin i sa fé dans aou séga maloya. Dopi lontan gèp i fé son ni dann i l’androi protézé. Zoizo rasanblé dsi lo fil téléfone, lé konm apré aspèr lo tangaz arivé... Bann z’ansien i rogard dann syèl pou oir si kékpar, si la pa lo matin, sé lo soir, na poin dann syèl in pyé d’van nyaz la désine. Mové prézaz ! Lo syèl i vien rouz kuivré kan solèye i lav son pyé. An atandan lo promyé souf sho konm sorti dann rin volkan, pou anons anou lo météore lé la.

Dann tan lontan siklone té i pran son tan. Pa toultan ! Défoi li té présé épi li té ariv san prévnir, konm i di san tanbour ni tronpète é si ou la pa gingn lo tan barikade aou, li lé kapab bate out kaz atèr. L’ané 1962 siklone Jenny la débark dsi nou san prévnir épi mi pé dir azot la kasé, la kasé, pa pou zoué, mé pou kasé brizé. Konm kozman i di, dann in ka konmsa nimérote out z’abati sansa ou sra an pène pou artrouv azot.

O fète, koméla siklone i mète son tan li osi é pli souvan ké son tour. Mé alor kosa k’i fé ké lo tann koméla, la pi lo tann lontan ? Pétète pars bann médya i konfisk nout tan. Pétète pars zot i anons san arété, ! Zot i prévien san arété. Zot i dovine san zamé trouv la vérité pou vréman. A ! bien sir, ni pé pi dir, konm dann tan lontan téi di : lo problèm avèk la météo sé ké li di pa touzour lo kontrèr d’la vérité. La météo lé syantifik koméla é sak i kroi pa sé son traka. Li sar kite pou son biskui.

Alé ! Ni artrouv dizèr avèk siklone pars dizèr sé l’èr li doi arivé. Sé l’èr gouvèrnman la di li doi arivé. Dizèr, rékta dsi lo pous, mon fra.