Oté

Siklone ! Lo konséyèr la pa lo péyèr !

Justin / 19 zanvié 2018

JPEG - 43.6 ko

Dopi dimansh néna inn-dé z’animatèr d’radyo mèm inn-dé z’ofisyèl i ankouraz demoun pou bien prépar azot an prévizyonn siklone k’i doi pasé, pétète talèr, pétète pa. Banna i débite longèr d’tan z’ot shaplé bon konsèye sansa sak lé moin bon.

An parmi z’ot konsèye, an touléka, sak moin la konpri i fo kour la boutik pou ashté d’lo, rode pil, rode la bouji épi ashté konsèrv. Mé a bien kalkilé, ni pé d’mann anou si sa lé bien itil. Dsi la késtyonn lo na kant mèm in solisyon bien sinp sé fé bouy d’lo épizapré fouète lo lo ziska k’i aère bien é lé pli lézé. Koméla néna bann filtr pou tir son koulèr pisa shofé akoz pa ansèrv sa. Mon granmèr téi fé bouy d’lo épi té i mète in pti kèr pèsh dodan sak té i gate pa son gou. Konsèrv ? Akoz ou i sava manz sa dann pèryod siklone alé oir ou i manz sa trépé dann tan normal… Pil, bouji lé bon mé pa an kantité, zis sak i fo.

Astèr alon kalkil in kou : mi pans la pa bézoin éte ni étoné, ni agasé, si in pé i rovann dolo pars tout lo bann kondisyon lé réini : in n’afèr rar, donk in n’afèr shèr é na moiyin éspékil dosi. Konsèrv ? Zot lé sir kan siklone sar fine pasé, marmaye i sava manz sa. I diré mi antann azot kriyé épi pléré pars in pé la vouli bien fèr épi bien protèz z’ot zanfan si tèlman ké lo l’anvi d’bien fèr i fini par in parti d’pongn rant paran épi zanfan. Toué va manz konsèrv mon spès fi d’gars ! Wing ! wing ! wing ! Mi manz pa konsèrv.

Ala in zistoir mi rakont toultan é lé pa ou sa ké lé pa vré. Zot i an souvien kan mésyé Boush la fé la guèr l’Irak, isi lo brui té i kour do ri v’ariv a manké. L’èrla demoun la foulé dann gran sirfas pou alé rode do ri. Dann sèrtin l’androi demoun la bataye pou d’ri. Mé dori la pa mank zamé é in pé partou la kaz domoun mite la fé z’ot dimansh avèk so bann éstok la, shoniy la pass a l’atak, papiyon la fé pijon vol ansanm. Dori lété pi bon pou konsomé. Kosa i fé ansanm ? Késtyon san éro ? I jète biensir é kan ou la fine jété ou la pi é kan ou la pi i fo ou i argingn d’ot par tout kalité moiyin. Mi di pa plis !

Alor bann konséyèr, sré proférab tak in pé z’ot boush plito ké angant le moun pou fé la kouyonad.